random

آخر الأخبار

random
random
جاري التحميل ...

قصتي مع الايدز SIDA AIDS

قصتي مع الايدز SIDA AIDS 

المهم قصتي مع الايدز كان صيف 2010 كنت خدام في نايت كلوب دريمز اللي في لاكوط كنت كانتسنا تاللخر تاع السهرة وتانشوف الدرية اللي ماصيدها حد تاتريح معايا شوي دالوقت فاش تايمشيو لفيادر .. واحد النهار كانت وحدة من دوك الدريات غبرات كانسول عليها تاواحد ماتايجوبني مع المدة مبانتش جات واحد صاحبتها سولتها فيناهي الطنجاوية قالتلي واحد الجواب فش ليا الما في الركابي .. 

قالتلي الطانجوية مسكينة راه ناعسة في الفراش مريضة وتزاد عليها الحال قلتلها شنو بيها قالتلي فيها المرض الخايب .. آهيا ناري واااااهيا ميمتي .. علاه باقي هزوني الركابي ؟؟ .. دغيا تلاحيت فوق واحد الكرسي كان حدايا وجهي صفر عيني مبجقين فمي نشف من الريق .. أويلي أميمتي آش غانقول لعيباد الله .. آش غانقول لمالين الدار .. كولشي غايبدا ينفر مني .. غانموت الموت تاع الحلالف .. 

بديت نفكر فشي وسيلة نموت بيها بلا مانتعدب .. الايام تمضي و انا صافي قلت فيا بنسبة 100% نمشي للسيبير نبدا نقلب على الايدز و الاعراض تاعو فينما يجيني الرواح ولا السخانة نقول هي هادي اللخرة ليا في الدنيا .. ماقدرتش ندير تحليلة ولا نوصل الطبيب حينت في الاصل انا متيقن بأني مصاب خرجت من دريمز مشيت درت CFA في روبينسون .. نفس الأفكار تايجيوني يوميا .. 

قلت الى غانموت بالايدز اللهم ندير شي عمل بطولي مثلا اغتيال تاع شي ولد لحرام خصوصا جات مع الحماس تاع 20 فبراير.. تقريبا تال شهر 3 تاع 2011 كانت واحد الحملة تاع الكشف عن السيدا في ساحة الأمل قلت والله تانمشي ماشي باش نتأكد أني مصاب لكن باش ملي تخرج النتيجة يعطيوني الدواء الثلاثي .. مع تانتسنا نوبتي توصل تايبانليا واحد خارج من داك الكميو اللي تايديرو فيه ليزاناليز والسيد تايغون و الدريات يشدوه ويكالميوه خرييت فحوايجي كملات عليا .. قوادت عليا الدنيا كحالت في عينيا .. 

ترددت باش ندخل .. قلت اللي ليها ليها دخلت عند الطبيب تقبلي صبعي خدا شوي تاع الدم قالي تسنا من الجهة لخرى و عقل على هاد الرقم ملي نعيطو بالرقم تاعك دخل .. بقيت نتسنا شوي هي تبانليا واحد الصديقة خدامة معاهم .. أنا مخبي على بنادم و هاد الصديقة تاتعرف Bouchra و Mohamed و Lahcen Elhesnaoui يعني فضحتي بجلاجل غاتضربليا الطاروري فأكادير وانا ندير سلت و هربت قبل ماتشوفني ( ظني بها كان سيء حينت شفتها في التلفزيون كيفاش تاتخدم ) .. 

هربت و صورة تاع داك خونا مابغاتش تحيدلي من بالي مرضت فيها بالوسواس تاع بصح .. قلت باش ننهي هاد المعانات غانمشي للمركز تاع الجرف وندوز تما .. مشيت بعد خمس ايام من التحليلة اللي ماعرفتش الريزولطا تاعها دخلت عند الطبيب خدا الدم .. قالي 5 دقايق و نعيطو على رقمك حينت أصلا التحليلة تاتكون سرية و انت ماشي مطالب أنك تعطيهم اسمك او اي معطيات اللي تعرف بها براسك مجرد رقم تسلسلي لكل واحد من اللي كايدوزو .. جات وقت الحسم .. عيطو على الرقم تاعي اللي باقي عاقل عليه لدابا .. 

دخلت عندو بلا مقدمات قالي النتيجة تاعك négatif ماستوعبتش كلامو نيغاتيف يعني سالب يعني انا مريض أدوكتور .. ضحك وقالي انت ماعندك والو و الله ابعد عليك لبلا .. عرفتي باش نعاود ليكم Réaction تاعي فديك اللحظة راه خصني مجلد .. المهم من داك النهار و انا حريص جدا في اي حاجة تستدعي الوقاية .. 

مشات الايام جات الأيام ارجعت لدريمز سهرت تما تلاقيت مع الدريات اللي كانو تايجيو لتما سولتهم على الطانجوية قالولي مسكينة راه مزال مريضة و تادير chimiothérapie عاد باش فهمت أنها مصابة ب Cancer du poumon .. و في الأخير ننصح كل واحد عندو أدنى شك في أنه يقدر اكون مصاب مايترددش ويمشي يدير تحليلة مجانية و سرية ومتاخدش منك أكثر من نص ساعة

عن الكاتب

Mohammed AAFAS

التعليقات

loading...
loading...


إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

إتصل بنا

جميع الحقوق محفوظة لـ

شوف شوف TV

2017

تم الكشف عن مانع الإعلانات

الإعلانات تساعدنا في تمويل موقعنا، فالمرجو تعطيل مانع الإعلانات وساعدنا في تقديم محتوى حصري لك. شكرًا لك على الدعم ❤️